الخميس، 24 فبراير، 2011

كلامى لازم يجيب نتيجة معاها

انا : حبيبت قلبى يا قطتى

سمر : هاجر يا جماعة انقى بنت ممكن تعرفوها

انا : ميرسى اخجلتينى والله "بقولها بمياصة ليه كدة"

سمر : اعرفك على شلتى

ايمان هى اللى بتعيط هناك دى

والاخت نور

اما الاساتذة محمد وعلى

اهلا جميعا

نور : لا فعلا شكلك pure اوى

انا : ميرسى يا نور من زوقك

لسة بخلص الكلمة وايمان رجعت بعد ما خلصت تليفونها

"والله بينى وبينكم شكلها بتعيط بسبب التليفون ده "

ايمان : مين دى

سمر : هاجر صديقتى

ايمان : اهلا

انا : اهلا بيكى يا قمر "اهلا قال قلة ذوق"

سمر : اية اللى حصل

ايمان : بعدين

سمر: اتكلمى

ايمان : قولت لك بعدين

انا : طيب انا هقوم اشترى واجى

محمد : خدينى معاكى يا هاجر

"يا دى الورطة طيب اقعد ولااعمل ايه فى النيلة دى"

انا : حاضر اتفضل

"ومشيت وانا عليا غضب ربنا .. لو حد شافنا هيقول اية على الاقل كنا هناك شلة وبيس .. بس انا واثقة فى انى مش بعمل حاجة غلط خلاص انسى بقى الناس شوية وهو المشوار مش بعيد .. بس انا عاوزة اعرف هى بتعيط ليه"

محمد : انتى قدنا ولا اية

انا : اّه فى سنة تالتة معاكم

محمد : شكلك صغيرة

انا فى صمت رهيب مش عارفة ارد عليه

محمد : ده شئ كويس على فكرة

انا : اّه شكرا

محمد : اية موضوع الخضرا الشريفة ده بفى

انا : اصلى مش بكلم ولاد

محمد : ده على اساس انى سوسن يعنى

انا : ههههههههههه لا مش اقصد انا اقصد مش بصاحب

محمد : على فكرة ضحكتيك جميلة اوى

"الله يخرب بيتك يا سمر على بيت محمد"

محمد : مش بتصاحبى ليه بقى

انا : مستحرمه الموضوع وكمان فى يوم من الايام لو صاحبت وجه وقت اللى المفروض افكر فيه فى الجواز هيكون صاحبى ده اول واحد سيبنى ويمشى

محمد : مش كلهم والله يا هاجر

انا : ممكن بس الاغلب كدى يا محمد

محمد : بصى هو مش كلهم والاغلب صح وبينى وبينك انا مش هتجوز اللى مصاحبها ابدا

انا : مش هتزعل او تضايق لو سألتك ازاى صاحبت فى الاول

محمد : كنت فى اولى اعدادى و فى درس العلوم جت بنت ليا بعد وانا واقف مع اصاحبى وقالت ليا محمد عوزاك

وشدتنى من ايدى قدام الكل ومشيت بعيد اوى عن مكان الدرس

وفجأة انا بحبك يا محمد

انا : "طبعا هموت من الدهشة من الموضوع" يا سلام بتتكلم بجد

محمد : والله الحقيقة يا هاجر ومش عاوز اسوأ سمعتها بس بعدها عملت حاجة قذرة جدا وبليز مش هينفع اقولها

انا : مش لازم "عاملت اية عاملت اية بقى" بس هو قالت كدة وخلاص

محمد : فضلناا اسبوع زى السمنه على العسل اصل هى كانت امورة اوى وانا اول مرة اصاحب بقى وكنت مبسوط ان واحدة زيها بتحبنى

"وصلنا للكنتين واشترينا"

محمد : كل الولاد اتلمت حوليا على انى انا الجامد اللى مش معقول فأجمل واحدة فى الدرس بتحبنى بس بعد الاسبوع بدأت هى تتغير انا كنت لسة مش فقت من الفرحة بس هى لا فاقت وبعد 3 اسابيع بالضبط فركشنا

انا : لية بقى

محمد : يا ستى هى قالت انا اسفة كنت فاهمة شعورة غلط فانا قولت لها ده انتى عملتى معايا اللى ميتعملش من بنت

فقالت عادى يعنى هملت معاك اية زيك زيهم يا مان

وتانى يوم عرفت انها مصاحبة ولد تانى من نفس الدرس

انا : هى عملت اية بالضبط

محمد : ههههههههه سيبك بقى لانه مش حلو

انا : اوك

وصلنا عند سمر

محمد : لا صحبتك دى عسل وزى نور ما قالت بيور كدة وتخليكى تطلعى المستخبى كله

سمر : مش كدة يا ابنى انا برضوك اصاحب اى حد ولا اية

هاجر : لا لا مش تحرجونى

على : ايمان خفى عليه

ايمان : انت مال .......

انا : ما تيجى نتمشى شوية كدة

سمر : جومى بينا بلا نكد

انا : "وهى دى الفرصة يا قلبى" اية اللى سمعته ده يا سمر

انتى بتصاحبى

سمر : هههههههه من زمان اوى من ايام ما كنت معاكم

انا : يا سلام

سمر : والله بس ساعتها كنت جديدة فى الموضوع ومخبية بقى

انا : سمر اخرة الصحوبية وحشة

عارفة لو حيتى حد بجد وعرف انك كنت مصاحبة قابلة هيعايرك طول عمرك يا سمر

سمر : يا ليدى ومين هيقوله

انا : مين اية يا سمر ده البشر كلها عارفة انك مصاحبة

سمر : دى لعبة على النت

انا : بدأتى ازاى بقى

سمر : برصى يا ستى انا كنت فى امان الله بلعب بلياردو وواحد كاميلة دخل واتعرفنا

فى الاول كنا اصحاب واصحاب اوى كمان وبعدها حسيت انى بحبه اوى اوى اوى

واتعلقت بيه بس سكيت شوية على الموضوع ومش قلت له

انا : انا اعرف انه دخل على اميل صاحبة وكلمك من هناك

سمر : ايوة يا حبى هو بالفعل عمل كدة دخل على اميل صاحبة للعبة علشان يجربها ولما لاقنى اتكلمنا وانا كنت اعرف صاحبة ده من نفس اللعبة

بس كنا مش بنتكلم كتير يعنى

انا : كملى

سمر: المهم انا حبيته اوى واتعلقت بيه مش قادرة اقولك اد اية يا هاجر

وهو فى يوم قالى انا بحبك وعاوز اشوفك

هو طبعا كان شاف صورتى اللى على الميل فعارف شكلى

اتقابلنا وعرض عليا انه يكون البوى فرند بتاعى

بينى وبينك انا وافقت على طول

كنت حابة من زمان انى اجرب الموضوع فقولت اوك

وبعد فترة سيبنا بعض لاسباب تافهة

انا : اللى هى اية بقى

سمر : مين اللى على الفيس ده

بتلعبى اللعبة دى لية هو انا مش قولت لك انك مش تدخليها تانى

يا بنتى انتى اية مش سامعة كلامى ما تشيلى صورتك اللى على الميل دى

وطبعا انا مش هصحب واحد يشلنى .. لا بلاش منه احسن

انا : لا عند حق "يا لهوى على الناس " بس يا سمر مش ملاحظة انه كان بيشك فيكى كتير

سمر : اّه ما انا عارفة ما هو ده يا بنتى الغلط من المصاحبة انه اى حد بعد كدة هيشك فيكى

انا : لا حول ولا قوة الا بالله طيب ما انتى عارفة اهوه امال بتصاحبى لية

سمر : يا بنتى الصحوبية دى فرض عليكى لو دخلتى فى الموضوع مستحيل تطلعى

انا : يا بنتى انتى بتقولى اية انتى ممكن تقفلى موبيلك شهر والاميل تنسيه وتغيريه والاكونت بتاع الفيس الغيه

وبلاش تيجى النادى فترة وكلهم هينسوكى صدقينى وهتفتحى صفحة جديدة اوى من حياتك

سمر : سيبك انا اشتكيلك يا ستى ما تسبينى

انا : يا سمر مش لازم تشتكيلى انا بنصحك

سمر : خلاص بقى سيبينى احكيلك على التانى بتاع الفيس بوك

انا : هاااااااااااا يا ستى


___________________

وكفاية عليكم كدة بقى

الاثنين، 7 فبراير، 2011

مش عارفة نخليها بدون عنوان

السلام عليكم ورحمة الله وبركاتة

__________________________

مش عارفة اية اللى خلانى اعطيها ميعاد بالسرعة دى كان المفروض انى افكر شوية فى العواقب

افرض مثلا كان وراية حاجة وكمان ماما مش هتنزلنى

يوووه انا هقرف نفسى لية انا ان شاء الله لما يجى الخميس هتصرف ان شاء الله

المهم كتكملة للضياع الابدى اللى انا فيه رحت لماما

انا : ماما يا حلوة يا بطة اية الحلاوة دى .. بقالى كتير مشفتكيش لابسة اسود "فى الغالب المفروض ان الكل توقعة احمر :|"

ماما : عاوزة كام

انا : هو انا بتاعت الكلام دة برضوة

ماما : عاوزة كام يا هاجر

انا : انتى لية مش بتحبينى انا جاية ادلعك

ماما : انا مش بحبك ده انا ضيعت عمرى علشانك انتى واخوكى

انا : "بدأ المسلسل الدرامى "عاوزة كام يا ماما

ماما :هههههه ماشى يا ستى عاوزة اية

انا : باقلى كتير متكلمتش معاكى

ماما : اه والله احكيلى يا هاجر

انا : هتسمعينى يا ميرفت"من باب الاستهبال"

ماما : ميرفت مين احكى يا بت

انا : بت وميرفت مين .. انا ماشية

ماما : هاجر اتكلمى احسنك

انا :"ما دام قالت احسن لك يبقى قلبت جيمس بندق وانا مش قده" تعبانة يا امى

ماما : مالك

انا : بدون درامه انا فعلا واقفة قصاد ناس كتير
عارفة يا امى حاسة انى لوحدى قصاد العالم
كله بيخبط فيا ويحاول يأخذ منى حاجة وانا بقاوم وبرجع الحاجة دى
كل واحد عندة فكرة زى الزرعة بيحاول يزرعها فى راسى ويرويها بقصص فارغة وتضيع وقت

ماما : ومن اية ده كله

انا : كل حاجة . كل الناس اللى حوليا بتعمل كدة

ماما : وانتى لية تسيبيهم يزرعوا الافكار دى فى رأسك يا هاجر

انا : لا محدش يقدر ده انا جوجو الخطيرة .. بس مجرد محاولتهم ده تاعبنى اوى يا امى

ماما : بس نجاحك على افكارهم نتيجته اية

انا : ملوش نتيجة بنجح على فكرة بلاقى ملايين الافكار مكانها

بمشى خطوة كل فين وفين وانا لسة قدامى ميل بحاله

ماما : اقولك على حاجة تخلى الخطوة دى كل دقيقة وتخلى الميل متر واحد

انا : فينها دى

ماما : استعينى بربنا واكتبى افكار على ورقة

واقرئيها كويس اوى وسيبيها ونامى وبكرة اصحى واقرأيها وهتلائى الاجابة فى رأسك

بتقولك اذا كنتى فعلا بتعملى الصح ولا الغلط وده هيعطيكى نشاط ملوش حدود تمشى الميل كله وكأنه متر واحد

انا : ماما انتى الافضل

ماما : هاجر .. قومى ذاكرى عندك امتحانات :D

انا : ورجعت ريما من عند خالتها فى مرينا

مش هضحك عليكم واقول ان كلام ماما ريحنى لانه فعلا ريحنى اوى

عملت وى ما قالت ونمت وصحيت وفعلا انا اللى صح وهكمل لية لا

انا هاجر بنت مش مصاحبة وافتخر جدا :)

المهم

بما ان النهاردة الاربعاء وده ميعاد مهم جدا فى حياتى المهنية

طبعا مش علشان عندى مدرسة ولا حتى علشان عندى درس

لاااااااااااااااا النهاردة مهم لانى معنديش حاجة اعملها ولسة حوالى اسبوع على خطوبة معتز وانا فى البطاطا خالص

ولا حتى اعرف هلبس اية

فرحت لماما تانى

انا :حاجة "عارفين صوت الحمير هو بالضبط كان صوت زية"

ماما : اية

انا : اية فى ام تقول لبنتها اية .. ده بدل صباح الخيرات يا قمراية ولا كلمتين حلوين .. اية

ماما : كفاية عليا هعملك فطار

انا : ده واجب كل ام اصلا

ماما : خسارة فيكى العجة مش عاملة

انا : والله العظيم انتى مفيش زيك انا مش عارفة ازاى انتى مستحملانى وبتعملليلى فطار
ابوس رجلك اعمليها بلييييييييييييييييييييييز

ماما : عاوزة اية؟

انا : هلبس اية فى خطوبة معتز

ماما : فستانك

انا : نعم انهى فستان وانا حيلتى فساتين

ماما : اللى هنجيبة النهاردة انا وانتى

انا : "انا بعشق ماما" يا حبى ميرسى بجد

رحت بقى وقلت اكافأ الحاجة بأنى اذكر

بفتح المذكرة واقول بسم الله واذا بخالد والواد عبد الله" الغامض ابو كاب"

اية بقى انا عاوزة اركز مش هينفع كدة

قولت خلاص انا ان شاء الله هركز

بسم الله وقتحت الدرس واذا بماما والعجة داخلين عليا

اية يا جماعة انا عاوزة اركز

شكرا يا ماما

اقول اذاكر واذا بالعجة تبرد وانا بحبها سخنة
لا اكل بقى الاول اكل احسن

تؤ هأكل كدة من غير تليفزيون حتة

لا لا انا هقوم هم ربع ساعة اكل واقوم

وشديت بقى يا معلم لحد الساعة 6 تليفزيون

وبعدها رحت اشترى فستان وروحت تعبانة ونمت

وراح اليوم عليا

وكنت هموت نفسى هو انا علشان اخذ خطوة ارجع بيها 20 خطوة

كتير 20 كانوا 10 كفاية

المهم صحيت من النوم على تليفون

انا : مين

المتصل:انا سمر

انا : سمر مين

سمر : سمر يا هاجر اللى هتأبلينى النهاردة

انا : اه سمر سمر . عاوزة اية الاسعة 8

سمر اصحى يا كسلانة واجهزى

انا : اجهز لاية ؟

سمر انتى مش جاية النادى النهاردة؟

انا : اه

سمر : طيب يلا الساعة عشرة هنكون هناك

انا : خرب بيتك 10 اية يا هبلة

سمر : جيم وبعدها سونااااااااا وبعدها انا هلعب ماتش فولى ونتمشى لحد بليل وبليل نصيع مع العيال

انا : انهى عيال

سمر : هعرفك على شلة فظيعة

انا : سمر هقتلك لما اشوفك انا هاجى لك بليل يلا سلام

ورميت الموبيل رمية قال مصحيانى منالصبح على النادى

ونمت طبعا زى البطيخة وده وجه الشبة بينى وبين البطيخ الحقيقة

وقضيت اليوم بس اليوم دة ذاكرت ونزلت على النادى وهناك انا شوفت سمر

سمر : شلة انا هعرفكم على اطيب مخلوقة فى الكون وهى هاجر

"الخضرا الشريفة"

انا :.......................

_______________________

انا تعبت

انا اسفة على التأخير انا واخدة الاجازة من زمان ولكن بجد فية حاجتين

الاولى هو انشغالى بالاحداث

والثانى هو ان فية ناس كتير هتقول ى بت فاضية رايقة تكتب قصص احنا مش فاضيين نقرأ

يعنى اراء ولكن فى النهاية كان لازم اعمل حاجة فى الاجازة

وقريب اوى اقرب مما تتخيلوا هيكون فية حلقة كمان ان شاء الرحمن

سلامات

جهاد محمد