الجمعة، 10 ديسمبر، 2010

الفرق بينهم

لما روحت البيت كنت قمة فى الفرح على عكس اى يوم تانى

يعنى ممكن تقولوا رجع ليا اصحابى تانى

حاسة انى ........ مبسوطة بقى وخلاص

وذاكرت

اخيرا ذاكرت

يا ربى ذاكرت وكنت بقرأ الكلام وكأنى ماخذتوش قبل كدة

شئ ممل اوى بس بجد زادت فرحتى بأنى ذاكرت

يعنى بقالى كتير اوى معملتش كدة

المهم بعد ساعات من المذاكرة رن موبيلى الغالى

معتز : لبستى يا هانم

انا : البس لية ؟ فية حاجة

معتز : هاجر انتى نسيتى معادنا الساعة 6

"اوبس"

انا : اه يا معتز انا لبس هتعدى عليا

معتز : اه

انا : طيب سلام

يالهوى انا نسيت

لبست بسرعة الصاروخ ولا اعرف انا عملت كدة ازاى

معتز وصل على الوقت بالضبط

طبعا طلع ليا علشان يأخذ اذن بخروجى من الحاج "اعرفكم على الحاج بابا"

المهم نزلنا ورحنا مكان اول مرة اشوفه فى حياتى

كانت حديقة كلها ورد pink

مش عارفة الحديقة كانت منورة اوى بجد حلوة جدا

وشوفت الاء "قمر دى كلمة قليلة جدا عليها"

انا: وقعت واقف يا معتز

الاء : حبيبتى هاجر

انا : الاء ازيك

الاء: ازيك انتى يا قمر .. معتز من يوم ما عرفته وهو بيكلمنى عنك

انا : بيغتابنى .. اهئ اهئ

الاء :هههههه لا بيقول عنك كلام حلو اوى

انا :اخويا حبيبى لو قال غير كدة هأكله

معتز : احم انا واقف يا شعب

انا : يلا يا الاء كلمينى عنك

وفضلنا نرغى انا وهى ولا كأننا نعرف معتز اصلا

تقريبا ساعتين رغى متواصل

وبعدها روحت انا ومعتز

معتز : اية رأيك

انا : اية ايه رأية دى ؟ انت بتتكلم عن علبه وبضاعة

معتز : فلسفة وبقى وهنبدأ

انا: بص يا سيدى هى عسل اوى اوى اوى وشربات خالص

بس

معتز : ايوة

انا : بس لو متجوزتهاش كون واثق انى مش هعرفك تانى علشان انا فعلا مش هتمنى ليك حد اجمل من كدة

معتز : بتتكلمى بجد !!

انا : اكيد يا معتز .. صدقنى ارتحت لها اوى >> يا بختك على فكرة مش الكل بيتجوز اللى بيحبهم

معتز : مش الكل فعلا بس ده بأديهم

انا : مش فاهمة

معتز : بصى يا هاجر اللى بيحب حد بيضحى علشانه بكل شئ

انا : ده كلام افلام بس يا معتز الواقع حاجة تانية

معتز : لية يعنى ؟؟ ده حقيقة يا بنتى . دلوقتى مفيش جواز بالعافية

انا : كلام بجد

معتز : انتى يائسة اوى لية كدة .. لو فيه حد قوليلى وانا اجوزهولك

انا: هههههههه يا عم سيبنى فى حالى

معتز : بجد فية حد كدة ولا كدة

انا : لا طبعا ويا رب على طول لا

معتز : لية بس يا بنتى

انا : حب اية يا معتز لا يا سيدى مليش فى الحب ولا الكلام ده

معتز : الحب مش عيب ولا حرام .. الحرام هو الوقوع فى الغلط .. الصحوبية يا هاجر

انا : مفيش فرق بين الحب والصحوبية يا معتز .. كل اللى بيحبوا بعض متصاحبين

معتز : اكيد غلط . اكبر دليل انا والاء ازاى كنا بنحب بعض واحنا مش متصاحبين

انا : اممممم . لكل قاعدة شواذ

معتز : مش هتفهمى الفرق غير لما تحبى

انا : وان شاء الله مش هحب

معتز : هنشوف .. اهم حاجة انتى عارفة انا موجود على طوووول اى حاجة تحصل عرفينى .انا هنصحك لله يا هاجر مش لمصلحة وانتى عارفة

انا : اكيد يا معتز بتقول اية يعنى

وصلنا اخيرا لبيتى الغالى

وبرضوك ذاكرت حبة

ودخل عليا محمد "اخويا الصغير"

هاجر انتى شوفتى العروسة

انا : اه شوفتها

محمد : اممم حلوة ؟

انا : اه حلوة

محمد : زى مين كدة

انا : انت فاضى يا محمد

محمد: اه انا فاضى

انا : طيب انا مش فاضية .. برا يلا

محمد طلع برا من هنا وانا اتصلت بهمسة من هنا

همسة : السلام عليكم

انا : وعليكم السلام ازيك يا همسة

همسة : تمام وانتى

انا الحمد لله

وشوية كلام عادى

انا : جبتبلى رقم سمر

همسة :اه صحيح هبعتهولك دلوقتى

انا :طيب بيس

انا :بيس

بعتت الرقم وانا اتصلت

انا : السلام عليكم ورحمة الله وبركاتة

سمر : وعليكم السلام .. مين معايا

انا : هاجر

سمر : ايوة همسة قالتلى

انا : ازيك يا سمر عاملة اية واية اخبار الاعدادية معاكى

سمر انا بخير وانتى

انا : الحمد لله تمام

سمر : عاوزة اشوفك يا مولة

انا : يا ريت والله

سمر : خلاص الخميس

انا : اشطا يا سمر

سمر : بيس يا جوجو

_______________

بيس يا شعب

الجمعة، 19 نوفمبر، 2010

النت وسنينه

روحت بيتى وزى ما قلت لكم هنفجر من الغضب والالم على هدير

كان احساسى بجد صعب "مش هكون معاكم اوفر بس هى دى الحقيقة بجد"

فتحت كتابى وفضلت اذاكر شوية وافكر شوية فى كل اللى بيحصل دة

وفجأة رن التليفون

الوا يا معتز

معتز : ازيك يا هاجر

انا :تمام

معتز : بقولك الخطوبة كمان شهر ان شاء الله شوفى انتى هتعزمى مين يلا واتصلى قولى لى كام دعوة تحتاجيها

انا : مش هتورينى العروسة

معتز : فاضية بعد بكرة الساعة 6

انا : عندى درس انجلش

معتز : خلاص يوم تانى

انا : اقولك انا هلغية خلاص اشوفك الساعة 6

معتز : طيب سلام

انا : سلام

فضلت اذاكر شوية ونمت

تانى يوم رحت المدرسة وخلص يومى الدراسى بالسلامة

وبعدها روحت ولبست ونزلت على همسة

همسة : ازيك يا هاجر

انا : تمام وانتى

المهم سلامات وتحيات

همسة : عاملة كدة ليه يا هاجر

انا : عاملة ازاى يا قلبى

همسة : يعنى مش هاجر بتاعت زمان

انا : هاجر مين بقى بتاعت زمان

انا : انا هاجر بتاعت كل وقت مش بتغير يا همسة

همسة : انتى شايفة كدة

انا : اّه .. شايفة كدة

انا : صحيح خطوبة معتز كمان شهر واكيد اننتى اول واحدة معزمة

همسة : انا وهدير

انا : هدير بقى ربنا يصلح حالها

همسة : طيب لو قلت لك انها جاية دلوقتى

انا : يبقى انا همشى .. سلام

همسة : هاجر بلاش هبل بقى

انا : انا اللى بهبل يا همسة .. انا بس زعلانة ان اللى كنت بتسند عليهم خلاص بقوا زى كل الناس

همسة : بس امبارح هى كانت بتقول انها خلاص قفلت الموضوع يا هاجر

همسة : هاجر انتى لو كنتى عملتى كدة محدش كان هيقول لك اى حاجة على فكرة .. ولا كنا هنزعل .. عافة ليه

انا : لية ؟

همسة : لان اللى احنا شيفينه ان ده عادى وكل الناس بتعمل كدة يا هاجر .. كل الناس

انا : بس مبدأنا احنا ليه نقلد كل الناس لو هم غلط واحنا عارفين

همسة : لية بنقلد الموضة لو حتى الالوان مش بنحبها

"لحظة صمت ودخلت هدير"

الحقيقة متوقعتش اللى هعمله

عيط كتير وبعدى هدير

هدير : اية يا هبلة ده بتعيطى ليه بس

انا : قصرت معاكم وده مش اللى انا عوزاه

همسة : بس يا نكدية منك ليها كفاية

هدير : المسامح كريم

انا : كريم اوى

همسة : خطوبة معتز كمان شهر

هدير : بجد يعنى هتخلصى من زن خالتك

انا : هاها ايوة اخيرا يا هدير

همسة : هتلبسى اية

انا : اية رأيكم فى جينز مقطع وبلوزة مقطعة

همسة : نعم ياختى

هدير : هاجر بتهزرى مش كدة

انا : اكيد .. هلبس فستان

همسة وهدير فى نفس واحد : وانا

انا : طيب تمام .. انا هروح بكرة اشوف العروسة

هدير : صوريها علشان نشوفها

همسة : بطلوا تفاها وتعالوا ننم شوية

هدير : مين

همسة : سمر

انا : سمر .. مين سمر

همسة : سمر اللى كانت معانا فى المدرسة السنة اللى فاتت

هدير : اّه البت الدلوعة دى

انا : مالها

همسة بتصاحب

انا : اية الجديد

همسة : عن طريق النت

هدير : جديدة دى

همسة : والله دى اتعرفت على تلاتة

انا : تفاصيل

همسة : الاول دخل على الايميل بتاع صاحبه واتكلموا شوية وبعدها اتقابلوا

التانى عن طريق الفيس بوك وبضوا اتقابلوا

التالت عن صاحب واحد هى تعرفوا عن طريق النت وكانوا بتقابلوا

انا : يا صلاة النبى احسن

همسة : على فكرة انا اتكلمت معاها وهى اللى حاكتلى كل حاجة

انا : بس وحشة اوى البت دى

همسة : بجد هى بنت كويسة اوى وعندها استعداد تبعد عن الصحوبية

هدير : طيب ما تقوليلها

همسة: انا قولت لها فعلا تبعد

انا : وقالت اية ؟

همسة : هى متردده بس ممكن بشويه اقناع وزن

انا : هاتيلى رقمها يا همسة لو سمحتى

همسة : مش معايا بس اجيبهولك

انا : اوك .. انا هقوم بقى

سلام يا بنات

سلام يا هاجر


الجمعة، 12 نوفمبر، 2010

المفاجأة

رجع معتز وفعلا معاه خبر بجد سعيد وهو ان خلاص هيخطب البنت اللى بيحبها

بجد مكنتش مصدقة نفسى اخيرا هفرح واخيرا هخلص من خالتى

معتز: هاجر استعدى الخطوبة كمان هر ان شاء الله

انا : عم السريع براحة شوية انا امتحاناتى كمان شهر وشوية

معتز: مليش دعوة ابدأى ذاكرى علشان انتى اول واحدة معزومة فى الخطوبة وبعدين معزومة اية ده انتى صاحبة الليلة كلها

انا: ماشى يا معتز حاضر

عدى اليوم كالعادة ورحت المدرسة وكانت الاجواء هادية اوى اوى عدى انى طبعا اكثر شهرة من الاول

قضيت يومى وسلام على كدة رحت الدرس وبرضوه كان هادى بس المستر كان وحش اوى

"كلكم مش هتنجحوا السنة دى كلكم ترحوا الرحلة وتلغوا الدرس على الغلبان عبد الله .... والله يا ابنى انت خسارة كون مع العيال دى"

عبد الله "مين عبد الله"

الفضول شدنى واوى وبدأ يشتغلنى

انا: مستر هو مين عبد الله

خالد :وانتى عاوزة تعرفى لية .. تكونيش ناوية تصاحبى ..

انا : وانت مالك يا غ

"دخل المستر"

المستر : اية اللى انا سامعه ده تصاحب مين وبعدين مفيش اى احترام للمدرس

خالد : مستر حضرتك مش شايف طريقتها

مؤمن : مستفزة البت دى اوى

انا : بت ام تبتك يا

المستر : هاجر خلاص وانتم كمان اسكتم ويلا علشان وقت الحصة يلا

خلصت وروحت وفضلت ااكر وانا دماغى مشغولة حبة بالخطوبة هلبس اية وهيكون شكلى اية
وشعرى وتصرفاتى هناك ازاى

كنت هموت من الفرحة ومن التفكير بجد

المهم فضلت على الحال دة اسبوع والجو هادى اوى اوى اوى وبعد اسبوع قولت اما اخرج شوية اتصلت بالبنات

انا : هدير يا حبيبتى وحشانى اوى

هدير : ازيك يا هاجر

انا : ازيك نانتى وحشانى اوى اوى اوى

هدير : وانتى

انا: مالك يا بنتى ناشفة اوى فى الرد

هدير: معلش

انا: لا بجد فيه اية

هدير: انتى بقالك ق اية مكلمتناش يا هاجر

انا : كتير بس غصب عنى يا هدير والله

هدير : اية اللى تعرفيه عنى من شهر

انا : اسفة يا هدير والله غصب عنى وبعدين انتى كمان ولا اتصلتى بيا مرة واحدة

هدير : اية اللى تعرفيه عن همسة

انا : ازيها يا هدير وكمان هفضل اقولك كنتى اسألى انتى عليا يا دير

هدير : تعرفى ان همسة فضلت اسبوعين فى المستشفى وكانت بتسأل عليكى اكتر من اى حد وكان نفسها تزويها مرة واحدة

انا : اية اللى حصل معاها ؟ مالها يا هدير

هدير : لا مفيش كانت تعبانة شوية واحنا اتخضينا عليها

"شوية صمت"
هدير : كانت مريضة بالقلب بعيد عنك واحنا منعرف ومش راضية تقول خوفا من ان احنا نشفق عليها

وفاكرة كمان لما وقعت مننا كان بسبب المرض

انا : هى فين دلوقتى ويا هدير

هدير: فى البيت خرجت امبارح يا هاجر

انا : انا هروح لها دلوقتى

هدير : انا هحصلك

قفلت التلفون وانا خلاص منهارة تقريبا

كل ده يحصل وانا مش عارفة

اصحابى خسرتهم
وهمسة عيانة "يا ربى"

المهم رحت لهمسة

ويا قلبى لاقيتها ولا الليمونة بجد "مكنتش بصدق الناس اللى بتقول الكلمة دى بس فعلا انا دلوقتى مصدقة"

وشها اصفر ونايمة على السرير زى القتيل

يا ربى اشفيها يا رب

رحت وفضلت جنبها شوية وهى صحت

صحى النوم يا حاجة وحشتينى يا همسة

همسة : هاجر يا قلبى وحشانى

انا : اسيبك يومين ارع ألأيكى حولتى

همسة : حولت ؟ حولت اية ؟

انا : حولتى لفصيلة الليمون

همسة :هههههههه تعبانة يا هاجر

انا : مالك يا قلبى مالك ؟ فيكى اية ؟ فين الاسد بتعنا

همسة : وحشتينى وعرفت ان الطريقة اللى هترجعك خوفك عليا .. فعييت نفسى علشان

انا : يا ولا .. تليفون واجيلك طيارة والله ما يعطلنى عنك الا الموت يا قلبى انا اسفة والله اسفة

همسة "فتحت نافورة من عينيها وحكت ليا كل اللى حصل"

همسة دى يا قلبى بجد على الرغم من انها ضعيفة بدنيا الا انا قلما بتعيط زى الناس وتقريبا دى المرة الاولى اللى اشوفها بتعيت

حكينا شوية واتكلمنا واذا بهدير دخلت

انا : كملت الات هدير جت

همسة : شوفى بقى يا هاجر انا عوزاكى تنزلى بأعظم سلام للاخت هدير .. بجد كانت جنبى كل دقيقة يا هاجر بجد

هدير : ازيك يا همسة ؟ عاملة اية؟

انا : وانا مليش اى حاجة .. يا شيخة والله غصب عنى والله .. وحشانى يا هدير بجد

هدير : ماشى

"فضلت هدير مكشرة بشكل مبالغ فية"

همسة : صحيح عملتى اية يا هدير فى موضوعك

هدير : فركشت

انا "مش عارفة موضوع اية بس اتحشرت وخلاص": اوبا فركشتى لية كدة يا بنتى بس

هدير "بكل عصبية" : همية انتى قولتى اية لهاجر

همسة : مقولتش حاجة

انا : اية يا بنات اية اللى معرفوش

هدير : لا يا قلبى

انا : انا مش هبلة يا هدير انتم بتخبوا عليا

هدير : لا بجد موضوع مش يستاهل اشغلك بيه

همسة : لا يستاهل

هدير "بأنفعال": همسة بس

انا : لا افهم لو سمحتم اية اللى حصل يا بنات

همسة : هاجر هدير مخبية عك علشان عارفة انك اول واحدة هترفضى الموضوع

انا : موضوع اية بس افهم

هدير : بصى انتى وهى الموضوع يخصنى وملكوش دعوة بيه

همسة : هدير مصاحبة يا هاجر

"عدوا معايا لحظات من الصمت" وكأن انا سمعت ان اسرأئيل انهزمت "زى ما هسمع ان شاء الله"

انا : طيب ومخبية لية يا هدير هحسدك

هدير : لا هترفضى الوضع

انا : طيب ولية يا هدير .. لية

هدير : انتى اكتر واحدة فينا عارفة لية .. انتى اللى خسرتى الكل علشان قالو لك صاحبى انا بقى مقدرش اخسر حد خالص

انا : انا كان ورايا انتم وفتشجعت وقولت اخسر الناس واكسبكم واكسب مبدأى يا هدير

هدير : وانا مكنش ورايا حد

انا : لية يا هدير وانا فين وهمسة فين

هدير : كل واحد وتفكيره بقى يا هاجر

"انا انفعت اوى وبدل ما اتكلم مشيت وسبتهم"

بس بجد انا هنفجر هدير تصاحب

الجمعة، 29 أكتوبر، 2010

حكايتى معاااااااااااااااااااااااااك

ماهى ابعدى عنى شوية انا تعبانة

تعدين احكيلك

اية يا هاجر احكى بقى اخص عليكى يلا

عليت صوتى فى اللحظة دى من شدة غضبى "ماهى انا مش نقصاكى ابعدى عنى"وكانت هى اللحظة لحظة صمت فى الباص كله وكل العيون علينا انا وماهى اللى سابتنى ومشيت راحت على كرسى تانى بعيد

"يا الله البنت زعلت منى"

طيب اعمل اية انا دلوقتى

مفيش حل غير انى بكرة ولا بعده لما اهدى لازم اروح اصالحها وبعدين

"هاجر هاجر هاجر"

ده صوت المستر اللى كان بيفوقنى من السرحان اللى كنت فية

المستر:مالك يا هاجر اية اللى حصل

مفيش حاجة يا مستر بجد ده كان يعنى انفعال صغير كدة وانا بكرة بأذن الله هصلح الموقف مع ماهى


المستر:بس لية الانفعال يا هاجر من الاساس احكيلى ... ده انتى زى اختى الصغيرة هى فى نفس سنك

احكيله ولا لا؟

احكيله ولا لا قولولى "مفيش منكم فايدة ولا حد نافعنى بحاجة"اّقول ولا

بص يا مستر الموضوع كبير ومعقد جدا ومتشعب واطرافه كبيرة

فعلشان تعرف لازم تعرف من الاول والموضوع هيطول

المستر:انا عندى وقت كفاية جدا علشان اسمعك
علم وينفذ يا مستر

طلعت شيبسى وطلعت ببسى "لازم الحكاية بقى" وعزمت على المستر وبدأت احكى الموضوع كله

والمستر سمع وصامت جدا جدا وحسيت ساعتها انه مش هيتكلم خالص لانه مثلا مشغل الفيبريشن

هههههه والله مستر طيب اوى اوى

المهم انا خلصت ووصلت معاه الى موقفى مع ماهى

فكان تعليقة

المستر:بصى يا هاجر انتى شهادة ومحتاجة تركزى اوى السنة دى وكمان انتى عاوزة تخترقى العالم الجديد اللى دخلتى فية وانا مقدر موقفك انك بتشوفى شئ جديد وكمان نفسك تجربى


لا مستر مش اجرب خالص

المستر:"لا يا هاجر انتى نفسك تجربى بس مبدأك منعاكى من ده ولو عوزة الحق .. انتى من حققك تجربى"

نعم اجرب اية يا عم الحاج "ده فى سرى" طبعا انتم عارفنى

المستر:بس من حق مبدأك انك متعملش كدة ومن حق دينك انك تحاربى كدة يا هاجر

ايوة كدة اعدل

المستر:"صدقيى يا هاجر الناس دى كلها مش عاوزة مصلحتك صدقينى اللى هيعوز مصلحتك هو انتى فخافى عليها ومتشغليش نفسك بتفهات عيال"

المستر:"وهقولك على حاجة كمان زى ما قال الولد الغامض ابو كاب هيترد فى حد من اخواتك ولد او بنت يا هاجر "

انا عارفة والله يا مستر انا عارفة كويس اوى

المستر:"خلاص يبقى نقفل على الموضوع ونعيش عادى جدا جدا جدا اديكى شايفة انه لسة حوالى شهرين ولا شهر وشوية على الامتحانات"

شهر وتسعة وعشرين يوم يا مستر

المستر:فالحة يا هاجر .. انا عاوزك تركزى ولول احتاجتى حاجة انا موجود اوى متجيليش

لا ازاى يا مستر

المستر:"طيب يا هاجر شكرا على الببسى والشيبسى وعلى القصة اللى مش عارف اقولك عنها اية دى"

متقولش يا مستر انا عارفة شكرا لحضرتك بجد

مستر هو قدامنا قد اية

المستر:يعنى نص ساعة بالكتير

ان شاء الله

كنوع من الراحة نمت النص ساعة دى
وصحيت على صوت المستر ونزلت وركبت العربية مع بابا وانا مش مركزة خالص

"عملتى اية يا هاجر"

دى كانت اخر حاجة سمعتها قبل ما انام فى كنبه العربية وكانت من ابى

صحيت بقى على صوت تانى خالص

"لولولووللوولوولولولوولولوللى"

زغاريييييييييييت !!! زغااريت !!! اللهم اجعله خير

فيه اية يا ماما فى اية

"اسألى خالتك يا هاجر "

فيه اية يا طنط؟ اه اولا ازيك يا طنط ؟

"أسالى معتز"

اساله اية ازى طنط ولا لية الزغاريت

"واذا بقفة ينزل عليا يغلينى مش عارفة انا مين
ببص ورايا معتز" " ازيك يا معتز؟

انتم بتزغرتوااااا لية لية؟

"تعالى الاول اما اخلص حسابى معاكى ولا رنة ولا تلفون نسيتينى يا هاجر
من اخر مكالمة وانا معرفش عنك حاجة خالص كدة اخص عليكى بجد يا هاجر"

اّاّاّاّه اخر مكالمة اللى انت هربت منى فيها يا حلو

لا كويس انا معنتش هعبرك عاوز تسأل ابدأ واتصل مش عاوز انا مش هسأل على حد

"بقيتى وحشة يا هاجر"

ايوة بقيت وحشة

بتزغرتوا لية بقى بتزغرتوا لية

"مش هقولك"

نعم .. هتقول يلا يا معتز

"لا"

معتز بلييييييييييز

"لا"

بالله عليك قول

"احنا جايين النهاردة علشان نستأذن جوز خالتى اللى هو بباكى .. فى خالتى اللى هى مامتك علشان تيجى معانا بليل لبيت عروسة ابن خالتك واللى هو انا"

وااااااااااااااااااااااااااااااو مبروك يا معتز الف مبروك بجد فرحتلك

"وفرحت لنفسى اخيرا هخلص من خالتى"

هع هع هع

عموما انا محتاجة تفاصيل اكتر عن العروسة تعاى وراياااااااااا

"روحت على المطبخ وعملت احلى كوبيتين شاى بسررعة"

احكيلى يا معلم هى مين ؟ واسمها اية ؟ وعرفتها منين؟ كل حاجة يا معتز

"حكى معتز كل شئ "

من الالف للياء

ولو حصل نصيب هتبقى الخطوبة بسرعة لانه مستعجل بيحبها من ست سنين

يا باختك يا معتز بجد "بيحب من ست سنين وهى مش تعرف يا قلبى عليهم"والله حاجة تجنن بجد

المهم قضينا اليوم ولبست ماماتى ونزلت معاهم وانا فى البيت على نار اكتر من معتز ومستنية الخبر الجميل ان شاء الله


_______________________________________

تسمحولى انا جهاد اتكلم معاكم شوية صغيرين

سورى يا جماعة والله الفترة اللى فاتت كانت سيئة جدا جدا جدا بالنسبة ليا وزى الناس اللى على الفيس ما هم عارفين انا كنت فى عملية و بجد والله العظيم والالم لسة مستمر بجميع الاشكال

وقدر معاناتى والله كبير فسامحونى وادعولى انى اخلص بقى علشان انا قعلا تعبت

سلامات

الخميس، 7 أكتوبر، 2010

مشتنحنا

روحت البيت وانا لسة بأثر الزعامة المطلقة اللى كنت فيها

روحت البيت بنفس الفرحة المطلقة اللى كنت عليها

روحت البيت بنفس النفخة المنفوخة اللى اتنفختها

المهم انى روحت البيت

جهزت ولبست الحتة اللى على الحبل "انا الزعيمة ولا اتشيك"

ونزلت الدرس و المستر لسة مجاش زى العادة "الحقيقة انا اللى رحت بدرى شوية"

بس لاقيت المجموعة كلها سبحان الله

حركة غريبة كانت عند الولاد فيه حاجة حصل او هتحصل

وفعلا حصل وقف مؤمن ورفع ورقة وقال

مشتينحنا ..... مشتنحنا اللى نضربن لا مشتينحنا

مشتينحنا اللى ايدكنى يا هيجير تعلم على وشوشهم لا مشتينحنا

مشتينحنا اللى ننضربن كل مرة مرة من بت بت

مشتينحنا نوووووووووووووو مشتينحنا

وقف واحد تانى من اتبعاهم وقال الترجمة

مش احنا ..... مش احنا اللى نتضرب لا مش احنا

مش احنا اللى ايدك يا
هاجر تعلم على وشوشهم لا مش احنا

مش احنا اللى نتضرب كل مرة مرة من بت بت

مش احنا لااااااااااااا مش احنا

انا سمعت الكلام ده ومش قادرة اقولكم "سخسخت"

ضحكت لحد ما حسيت ان قلبى هيكسر ضلوعى ويخرج منها علشان ينبض برة شوية

ضحكت بجد وكأنى بقالى سنين مضحكتش

على الرغم من ان كل الاحداث اللى بتحصلى دى مجرد مسرحية كوميدية انا عيشاها

او معيشة نفسى فيها ............... فضلت اضحك لحد ما فى النهاية قام الولد الصامت ابو كاب

"ده الولد الجديد اللى جه فى نفس يوم مؤمن"

هى معاها حق بتدافع عن نفسها قدام مجموعة من الفاسدين بجد عندها حق
صحوبية اية يا
خالد يا اللى عندك اخوات بنات خاف عليهم يا اخى

وقف ابو لسان طول "مؤمن" وانت مالك وبعدين اخوات اية عاوز تقولى ان انت مش بتصاحب

رد عليه الصامت ابو كاب : لا طبعا لا

اخواتى يا اخى وانا بخاف عليهم ولازم كل واحد يخاف على اخواته وميعملش فى بنات الناس حاجة وحشة خوفا عليهم

رد مؤمن :انت كدة مصلحجى يعنى تحافظ على بنات الناس بس علشان تحافظ على اخواتك مش علشان بنات الناس دول زى اخواتك

رد الصامت ابو كاب : والله لو انت شايف ان انا مصلحجى ماشى انا مصلحجى

وانتها الحوار وانا كنت فعلا مبسوطة بالولد الصامت ابو كاب ده بس فجأة حسيت بشك غريب انه ممكن يكون زية زى
خالد

"فعلا انا مش لازم اصدقه كفاية عليا كدة مشاكل" ده كان حوارى مع نفسى

وقضينا لحظات من الصمت الدامس ولحد ما دخل المستر

دخل المستر وهو شايفنا صامتين جدا

وقال :/ فيه اية يا عيال ما لكم اول مرة ادخل اشوفكم صامتين اوى كدة مالكم

كلنا قلنا مفيش يا مستر

فشرح الدرس

خلص الدرس وعدى اليوم وتانى يوم رحت المدرسة ولا جديد غير انى لسة فيا شوية زعامة ولسة معروفة

وجه يوم جديد وخبر جديد من اذاعة المدرسة بأن فية رحلة بداية العام الدراسى

"بداية العام بعد ما عدى اكتر من شهر ونص لسة فاكرين"

المهم الرحلة عندنا نظمها اية

باص للبنات وباص للولاد

وفى الرحلة الاتنمين بيمشوا جنب بعض "عادى احنا اخوات دى رؤية المدرسة طبعا"

ميعاد الرحلة كان رائع جدا لانه كان بعد الاعلان يومين اى انه يوم الدرس بتاعى وانا هروح الرحلة اى ان الدرس هلغية

اشتركت فى الرحلة وروحت فرحانة جدا وروحت المدرسة فى اليوم اللى بعدها وانا برضوه سعيدة جدا بالخبر ده

واخيرا جه معاد الرحلة ركبت الباص وانا فاكرة انى لوحدى "بس للاسف" لاقيت شلة الانس وماهى كمان معانا فى الرحلة

وشرفتنى ماهى بجلوسها جنبى

سافرنا بقى الى حيث النعيم والشواطئ العظيمة "الاسكندرية"

يا جمالها الاسكندرية

المهم بعد مدة زمنية محسبتهاش وصلنا اللمكان المطلوب ونزلنا

واذا بجميع الولاد اللى معانا فى الدرس المتمثلين فى "
خالد ومؤمن واتباعهم طبعا"

جميعهم جم الرحلة عدا الولد الصامت ابو كاب "الولد ده لازم اعرف حكايته اية الفضول هيجننى"

الاساتذة وقفوا وقاالو الخطبة اللى بتتقال فى كل رحلة ومشوا قدامنا والبنات والولاد هاصوا

وابقيت انا لوحدى "طبعا كل ولد اخذ بنت وطار وانا البنت الوحيدة اللى مش بتصاحب فى الرحلة"

مشيت انا لحد ما ربنا بعت لى طوق النجاة

مستر طيب بجد زى ابى "زى اخويا الكبير علشان هو لسة شكلة صغير اوى"

المستر : مش ماشة مع اصحابك لية

انا :"ابتسامة" عادى يا مستر هم مشيين مع اصحابهم فانا سيباهم براحتهم

المستر: لا ازاى يعنى اتعرفى ععلى حد يلا روحى وامشى معاهم

انا :لالا يا مستر بلاش ارجوك انا كدة مبسوطة

المستر : يا حبيبتى انتى كدة منطوية على نفسك وده غط للى فى سنك

انا : يا مستر انا مش منطوية انا بس مش عاوزة ارخم عليهم حضرتك شايفهم منسجين اهم مع بعض كل جروب

"اوه سورى اقصد كابل" ده فى سرى

كل جروب منتسجم مع بعضه اهوه يا مستر

المستر : خلاص خليكى ماشية جنبى هنا متمشييش لوحدك

حاضر يا مستر

"عارفين احساس لما حد فعلا يحتضنكم -مش يحضنكم اقصد يحتضنكم ويرعاكم- احساس ظريف فعلا وحلو والمستر ده عرف يحتضنى فعلا لما لقانى لوحدى بس كان نفسى اسأله سؤال واحد <حضرتك لية مش ماشى مع الاساتذة اصحابك الانطوائية دى مش حلوة للى فى سنك يا مستر> بس مقلتوش طبعا "

***************

قضيت اليوم وفعلا كان حلو على الرغم من انى ماشى مع المستر الى انه طيب اوى ودار بنا حديث عن الدراسة والتعليم فى مصر بس استمتعت

والملاهى كانت تجنن برضوه كان يوم جميل جدا

ركبنا الباص وانا حسة انى هعيط علشان اليوم خلص من كتر ما حبيت اليوم ده

المهم ركبت بس سمعت فعلا حد بيعيط

فقولت اية ده فية حد حب اليوم ده زيى اوى كدة ولا اية فببص ورايا

لاقيتها صديقة
خالد بتعيط وحوليها البنتين اللى بيشتغلوا اتباعها دول

رحت لها وقلت مالك فية اية

وفجأة لاقيت البنتين دول ماسكين فيا ايوة اظهرى على حقيقتك جاية تشمتى فيها علشان قالوا لك ان
خالد سابها

لا يا ماما هى اللى سابته وهو مفطور من العياط انها رمته زى ................

سكت والله ما رديت بربع كلمة بس بصيت جنبى على باص الولاد

"الرؤية مكانتش واضحة اوى من الباص علشان الازاز" بس اقسم لكم ان
خالد كان بيرقص فى اللحظة دى مع باقى الولاد

فمديت ايدى وطبطبت "اى انى ضربتها براحة" على ضهرها ومشيت وبرضوه فى صمت

ورجعت معاكى وانا ساكتة ولية نفس اتكلم

فدخلت ماهى" وانا مش نقصاها" :: فية اية ؟ ها قولى فية اية ؟

***************

والله يا جماعة كان بودى اكتب اكتر بس فعلا صوابع ايدى اللى بتخبط فى الكيبورد وجعتنى والله

سامحونى بقى واعولى انى اعرف اكتب حلقة فى نص الاسبوع
-مش اكيد بس حاول-

سلامات .......... جهاد

الجمعة، 1 أكتوبر، 2010

الزعيم

قبل ما نخرج وبنص ساعة وانا وهدير موجودين فى بيت همسة " فجأة كدة " همسة اغمى عليها ........ جرينا لمامتها فطلبت الدكتور

جه الدكتور وبس فضل فى غرفة
همسة كتييييييييير اوى

احنا قمة فى القلق .... " يا رب يا رب " ده كان صوت بابها اللى مش عارف بنته مالها

خرج الدكتور وبعد فترة تعذيب لينا متقلقوش يا جماعة دى نزلة معوية بسيطة "بنتكم بس بتدلع"

جرينا احنا على
همسة بعد الكلمة دى ........ انتى كويسة .........اه تمام

همسة :انا اسفة يا هاجر كان نفسى اخرج علشانك

انا:اية يا بنتى اللى انتى بتقوليه ده خروجت اية دى اللى بتتكلمى فيها قومى بس بسلامة وانا اخرج وافسح وافرح واعمل كل حاجة

هدير:الف سلامة يا همسة يا حبيبتى ...يلا يا هاجر نسيبها ترتاح

اه يلا سلام يا
همسة

روحت البيت كنت قلقانة اوى على
همسة اللى وقعت فجأة دى "يالله .... انا ناقصة قلق"

نمت "خميرة ...... نمت زى المقتولين" وصحيت على صوت المنبة وكأنه صوت رصاص بيضرب جنبى

رحت المدرسة ..... اول ما دخلت البوابة ووقفت فى الطابور لاقيت كل بنات الفصول اللى حوليا بتبص عليا وكمان فصلى

احرجونى جدا وانا مش عارفة هم بيبصوا عليا ليه؟؟!

واذا بصوت يخرج بين دهشة الجميع وتعجبهم ويقول

هى دى
هاجر

"فية اية" حد عارف فى اية يقولى بليز قولى يا جامعة لو سمحتم

فضلت اقول كدة لحد ما جات واحدة من اول صفى وقالت "اللى انتى عملتيه حركة جدعة جدا مش اى حد يعملها"

بس انا عملت اية

"مش انتى اللى ضربتى
خالد"

خااااااااااالد ......... لية هو انتم كلكم فرحانين علشان انا ضربته ولا زعلانين ولا اية نظامكم

فرحانين طبعا ..... يا بنتى ده خالد ده سايب /4 من المدرسة ....... والربع الاخير هيموت ويصاحبة

طيب ومش بيصاحبوه لية ؟؟

اصل يا ستى "بنت انتى وهي بطلوا رغى فى الطابور واسمعوا الاذاعة" ده كان صوت الميس اللى قطع كلامها

خلص الطابور التعذيبى اللى بيتعمل كل يوم "عذاب على الصبح"

دخلت الفصل وكان اول حصة العاب " شوفتم الصدف " واذا ببنت تمسك الطباشير وتكتب على الصبورة "
هااااااجر"

والكل صقف والكل قال يا "زعيم"

اية يا جماعة فية اية

"فية اية ازاى يا بنتى كلنا كان نفسنا نفرح فى
خالد شوية وانتى عملتى كدة"

احساس جميل اوى لما تبقى معروف بعد ما كنت "لا شئ بالنسبة للناس اللى حوليك"

قمنا ولعبنا سوى والكل بقى عارف مين هى
هاجر

عدى علينا كمان حصص مرة نلعب ومرة يكون فى شرح

لحد الفسحة

نزلت الملعب والكل عارفنى "يا ما روعة احساسى دلوقتى وانا كدة"

اللى تيجى جنبى وتقول "انتى
هاجر" واللى تشاور زى الشعب ما بعمل فى تحية العلم

واللى تقولى يا زعيم واللى واللى واللى

"كنت هموت من الفرح وغصب عنى عشت الدور بقى وبدأت اتقنر على الخلق"

عادى اية يعنى لو انت مكانى هتعملى اية يعنى "ما باليد حيلة طبعتى البشرية يا جماعة ده مش غرور"

عشت الدور بقى

واذا بالناس كلها حولية عايشة الدور كمان

الكل جاى ليا يسلم واللى جاى يتكلم واللى عاوزة تتصور "لا كله الا كدة"

لحد ما جالى تلت بنات "عارفين الافلام الامريكانى اللى فيهم تلت بنات اتنين ضعاف الشخصية وواحدة متسلطة هم كدة"

انتى اللى اسمك
هاجر "انا بقى منفوخة" ايوة انا ....انا اللى ضربت خالد

لية يا هانم بتاع اية ......... "واللى وراها يردوا" اه بتاع اية "امركانى امريكانى احنا بنهزر"

وانتى مالك انا ضربته لية

ده حبيبى واحنا دلوقتى مع بعض وفور ايفر كمان ......... يبقى من حقى اعرف

يلا يا ماما اجرى روحى اسألى الزعيمة عملت اية فى
خالد يلا

والله لهتشوفى يا
هاجر

يا ساتر عليكى انتى والله بتحبيه "نفس الكلمة والله لهتشوفى يا
هاجر......ورينى يا ستى"

رن جرس الفسح وخلصت "وكان المفروض تخلص من ربع ساعة بس هم نسوا يرنوا الجرس واحنا طنشنا .......عادى"

حصص عادية ولحد ما خلص اليوم
روحت البيت
*******
والمفروض انى هروح الدرس بس انا مش هروحه المرة دى لية علشا انا تعبت من الكاتبة وعاوزة اقوم
والصراحة يعنى جعانة موت وانتى معطلنى عن الفطار :))

سلاااااااااااااام يا جماعة

جهاد

الجمعة، 17 سبتمبر، 2010

فضربته

قبل دخول المستر اصطادنى البنات "ازيك واخبارك كنتى فين ومش فين وكلام البنات مبيخلصش"
وفى اثناء الحديث الطويل اللى حصل قالوا لى على اللى حصل مع خالد

"اتعرف على بنت من يومين والبنت كانت فى نفس ساذاجتى كدة وطبعا لما عرفت الحقيقة قلبت عليه وخلعت منه بعد ما ضربته بالقلم "
<فرحة شديدة غمرت قلبى وكل اللى على لسانى اللهم لا شماته اللهم لا شماته>

واتكلمنا طبعا كتير عن اللى حصل معاه وبس فعلا البنت دى جدعة جدا هو ده الحزم

دخل المستر واخذنا الدرس وتمام ........... نازلة فى امان الله

نط عليا ماهى وايمن عاوزيين يروحوا معايا

فى دخلة مين برضوه ............................... خالد "يا حبيب ماما"

وبأعلى صوته " هاجر انا معجب بيكى بجد انا معجب بيكى "

لحظة توتر جامدة جدا بالنسبة ليا

بصيت حوليا لاقيت ماهى وايمن مشوا و باقى الناس اللى فى الشارع بصوا عليا

معرفتش اعمل اية فضربته بالقلم " افتكرت موقف البنت الجدعة والحزم فاتكلت على الله"

بجد ضربة جامدة جدا "من نوع القلم اللى بيلسع مش زى الاقلام الفرنساوى اللى مش قد كدة"

المهم ... جرى عليه واحد زميله من اللى حضروا الموقف وشدة لورا وخالد عمال "سبنى يا مؤمن سبنى والله لهتشوفى يا هاجر"
مؤمن : "حته واد زى ما الكتب بتقول عارفين شبة خالد فى جماله ودلاله ، وده واحد من الاتنين الجداد اللى قلت لكم عليهم "

وانا فى صمت رهيييييييييييييييييييب واقع عليا ......... وروحت وانا قلقانه مش من كلام خالد .. لا "ده فاضى" بس من شكلى الحصة اللى جاية

خلص يومى على كدة ورحت تانى يوم المدرسة وقضيت وقتى فيها وروحت "يوم عادى جدا مر عليا زى اى يوم"

وخلص اليوم كالعادة ولكن فى تالت يوم قررت التغيير" انا هخرج"

استدعيت اصحابى فى نداء عاجل وظبتنا امورنا للخروج

*****************

المرة الجية بقى هتعرفوا احنا خرجنا فين علشان انا عندى مدرسة الصبح

تصبحوا على خير وادعولى فى اول يوم ليا فى المدرسة الثانوى

ادعولى :))))))))))))) جهااااااااااااااد